伸論「毋才/m-tsia/」佮「毋著/m-tio/」詞組ê語氣
陳存
最近讀著台語漢字學者劉建仁ê「部落!」taiwanlanguage.wordpress.com，內面提起兩个台語ê詞組「毋才」 /m-tsia/ *佮「毋著」 /m-tio/ ，劉氏討論咧非常ê澈底。我佇這（tì-tsia）抄幾句作者提供ê例作參考：
等你無來，阮 “毋才”先行。——“等你無來”是 “阮先行”的原因。
有錢有閒 “毋才”有法度出國旅行。——“有錢有閒”是 “有法度出國旅行”的條件。
“毋著(m7-tioh8)” : “毋著……” 是對情理、事理判斷的能願動詞，佮 “應該” 、”需要”(華語:得ㄉㄟˇ) 差不多仝意義。親像 :
做代誌 “毋著”較小心一下。
出車禍 “毋著”緊叫救護車。
毋著(m7-tioh8)”就是 “著(tioh8)”，”毋(m7)”是無意義的助詞
劉氏提起有以前ê研究者判斷，即兩个組詞內ê「毋」是虛詞，沒特別意義，「毋才」等於「才」；「毋著」佮「著」意思全仝款。我從新詳細加伊分析了後，認為這个「毋」是語氣詞，伊佮英語文法ê「假設狀態語氣」subjunctive mood 淡薄仝款：「才」比「毋才」較（ka）有肯定ê意思。講幾个例子：
飲酒才爽快啊！
飲酒毋才爽快啊！
買票才當選。
買票毋才當選。
佇tsia（這）「毋」有談薄減弱效應(damping effect) 。按呢，「毋」失去保持原來否定ê話意，講話ê口氣兼淡薄á帶不定性ê色彩，kiam-tshai（敢猜？）「毋才」「毋著」佮「才」「著」相對話頭ê氣口，少可（sio-khúa）有差別，英語叫做nuance無仝。譬如講：
有罪著坐監獄（！）；殺人罪著死刑（！）。
有罪毋著坐監獄（？）；殺人罪毋著死刑（？）。
上頂面二句「著」是「應該」/「應當」，台語有時講「著ài（要）」。下面二句比較沒「定奪」（tìng-tuat），刣儂ê罪名佮刑法攏少可有疑問，會táng講無確定性 。加重疑問 ê時，後半句著講：毋著ài坐監獄服刑， honn？**
擱再（可再？）講一列：
作sing-lí（生意）著會趁銭(!)/(?)
作sing-lí 毋著會趁錢。
上頂句可以講話口氣沒仝，意思就全無仝。下句明明表示懐疑ê態度。
即類ê組詞除了劉氏提供ê「毋才」佮「毋著」以外，我現在會當想到ê，有「毋佇」（m-tī）/「毋咧」、「毋beh（欲）」等，四組「想必然」仰是「可能」ê預料口氣。
Ko-tsài（可再）khío （拾？）二个例：
汝作市長講話攏亂彈（lùan-tūann)，毋佇失常？
台語「失常」是無正常，頭殼有問題ê意思。氣口有一點a推測ê意思。
天有一點a烏烏，毋beh落雨？
天烏烏beh落雨。這句比較毋beh落雨較確定ê語氣。
綜合以上ê討論，「毋佇」、「毋beh」ê 「毋」”m”，並毋是完全無意思，伊是「預料」、「可能」抑是「想必然」ê口氣。另外。「毋才」ē-tàng用咧起事ê後果（consequence），可以用ti 事實（譬如以上劉氏ê例），抑是預料、猜測：
伊看起來真老實，大家「毋才」支持伊。
口氣比「才」ka無肯定。
「毋著」比較theg（的？）有肯定ê意思，但是也有一點a「勸告」ê意思，「著」差不多是「指示」、「指點」比「毋著」ka無懷疑ê口氣。總講一句，在這類台語特色ê組詞，「毋」/m/是有 “nuance” ê，意義上減弱直接ê氣口，是一點á揣測(tsūi-trek)ê助詞。
__________________________________
*「才」漢字音［tsâi］經過白話ê語音反序（metathesis）變作［tsia］。其他台語有同現象ê漢字白話音有「再」（再可tsia-ko）、由（úi）、秀（súi，新創俗字「媠」）等等。
**/Honn/（呼?）佮 /sim/（啿?）是台北附近台語常用ê疑問助詞。「呼」文讀［hoo］，白話音有［honn］佮［ōonn］兩音：嬰仔呼咽（ōonn-inn）睏一暝大一寸。
